मुख्य सचिव नियुक्ति: हाम्रो होइन राम्रो बनाउ !

बहालवाला मुख्य सचिव माथिल्लो ओहदाको लागि लालायित हुने र राजनीतिक दल तथा सरकारले देखाएको ललिपपमा रम्ने प्रवृत्ति र राजनीतिक दलहरुको आफ्नो मान्छे र आफ्नो स्वार्थ पूर्ति गर्ने पात्रको खोजि गर्ने प्रवृत्तिका कारण आज मुलुकी प्रशासन प्रभावहीन भएको छ l मुख्य सचिवमा पुग्ने व्यक्तिले आफ्नो पदको गरिमा जोगाउन र आफुलाई लाखौँ निजामती कर्मचारीहरुको अभिभावकको रुपमा स्थापित गर्ने तर्फ आफ्नो योग्यता, ज्ञान सिप र दक्षता लगाउनु पर्नेमा अवकाश पछिको लाभको लोभ र मोहका कारण राजनीतिक शक्ति प्रति लम्पसार पर्ने र राजनीतिक शक्ति रिझाउन जुनसुकै हर्कत गर्न पनि तम्तयार हुने प्रवृत्तिका कारण आज मुलुकको स्थाई सरकारको रुपमा मानिने निजामती प्रशासन पनि अस्थिर र अभिभावकविहिन जस्तो हुन पुगेको छ l यसपटक पनि मुख्य सचिव नियुक्ति स्वाभाविक र प्राकृतिक देखिएन l सचिवबाट तीन दिनपछि अवकाश हुन लागेका वैकुण्ठ अर्याल पदावधि सकिन साढे तीन महिना बाँकी रहेका मुख्य सचिव शंकरदास वैरागीलाइ राजिनामा दिन लगाई मुख्य सचिव बने l यसले “पदका लागि जे पनि जायज र अरु सबै कुरा गौण हुन्” भन्ने संदेश प्रवाह गरेको छ l उच्च आसनमा बसेर उच्च आदर्श, नैतिकता र मर्यादाको पाठ सिकाउनुपर्ने हाम्रा उच्च पदस्थबाट जहिले पनि यस किसिमका हल्का र आत्मकेन्द्रित निर्णय र व्यवहारका कारण नेपालको सिंगो निजामती प्रशासनले गतिलिन सकेको छैन । एक प्रकरले भन्ने हो भने बद्नाम जस्तो बनेको छ l